Markaðsvæðing menningar?!?

Ég er búinn að vera að lesa Draumalandið eftir Andra Snæ og ég verð að segja að þetta er alveg fínasta skemmtun að lesa þessa bók. Ég ætla ekki að vera að predika neitt efni bókarinnar (þar sem að fleiri en einn lesandi þessarar síðu nennir hreinlega ekki að hlusta á predikanir um náttúruvernd og hálendið).

Það er samt eitt í bókinni sem ég er búinn að vera mikið að spá í undanfarið. Í bókinni sér Andri það sem leið til "bjargar" bændum landsins að einstök bóndabýli verði duglegri að markaðssetja sig. Besta lambakjötið frá Rauðanesi, besta svínakjötið frá Þúfu II og svo framvegis.

En ég fór að spá varðandi það, afhverju að miða þessa markaðssetningu eingöngu við bændastéttina? Afhverju drögum við ekki þessa miklu markaðsvæðingu inn í önnur svið eins og t.d. menningu og sögu. Eins og mér er illa við að segja þetta... afhverju gerum við ekki eins og Bandaríkjamenn? Amerísk saga er markaðsvara, fólk getur keypt sér eftirlíkingar af sjálfstæðisyfirlýsingunni, hattinum hans Lincolns og fólk myndi eflaust greiða morðfé fyrir að fá að gista eina nótt í herberginu á Watergate hótelinu þar sem einn mesti skandall amerískrar sögu varð til.

Afhverju gerum við ekki svona??? Við gætum t.d. selt gistinætur í Höfða. Fyrir utan það að þetta sé mikilvægur staður í samtímasögunni (sem gæti laðað að söguviðundrin) þá á víst líka að vera mikill draugagangur þarna sem gæti laðað að sér einhverjar týpur á borð við Magnús Skarphéðinsson. Hugsiði ykkur bara auglýsinguna:"Eyddu nótt í Höfða og andaðu að þér þeim anda sem sveif yfir vötnum hjá Reagan og Gorbachev, reyndu bara að lifa af nóttina!" Þetta væri vissulega möguleiki en við gætum gert svoooooooo mikið betur.

Hver myndi ekki vilja eiga t.d. snærisbútinn sem kom Jóni Hreggviðssyni í vandræði og startaði þannig einni mestu ævintýrasögu íslenskra bókmennta? Það ætti að vera tiltölulega auðvelt og ódýrt í framleiðslu. En afhverju ættum við að hætta þar, við gætum farið hamförum í þessum minjagripa bransa. Ég veit að ég væri til í að eiga eftirlíkingu af Þjóðminjasafnssverðinu (sem ég man ómögulega hvað heitir í augnablikinu).

Hvað með leikfangaframleiðslu??? Við gætum farið af stað með leikfangalínu þar sem allar gömlu víkingahetjurnar okkar fengju sér með ferð. "Jólagjöfin í ár er Gunnar á Hlíðarenda (bogi og brennandi hús selt sér), og ekki gleyma sérstakri safnara útgáfu af Agli Skallagrímssyni, nú með auknu blóði, stærri öxi og útgröfnu horni fyrir mjöð" Þetta er eitthvað sem ég myndi pottþétt kaupa! Og fyrst að við erum komin út í leikföngin, hvað með litlar útgáfur af t.d. þorskastríðinu. Það væri hægt að framleiða landhelgisgæslu skip með togvíraklippur að gera breskum togurum lífið leitt.

Málið er það að við þurfum greinilega að selja sögu okkar og menningu betur því við getum ekki öll lifað á áli (þó svo að Esther dafni ágætlega á því!)

The next stage in evolution???

Mér finnst ég sífellt vera að heyra þessa setningu sem pirrar mig meira en allt annað:"Karlmenn eru svo einfaldir!" Þessari staðhæfingu get ég bara ekki verið sammála, ég vil meina að karlmenn séu bara nákvæmlega eins og þeir eiga að vera en konur eru bara of flóknar.
Konur segja gjarnan:"Það eina sem karlmenn þurfa til að vera hamingjusamir er matur og kynlíf og þá eru þeir vel settir!" Þessu er ég algjörlega sammála.

Málið er nefnilega það að við mannfólkið (homo sapiens) erum dýr, háþróuð kannski en dýr engu að síður. Öll dýr hafa sínar grunnþarfir, þ.e. að næra sig, fjölga sér og að verja sig og ungviði sín ef hætta steðjar að. Þetta er allt og sumt, þetta er í raun kjarni lífsins. Svoleiðis hefur það alltaf verið og svoleiðis ætti það alltaf að vera. Aldrei í jarðsögunni hefur einhver apafrú krafist þess af karlkyns apa að hann taki tillit til tilfinninga hennar. Ég er líka nokkuð viss um það að aldrei hefur kvenkyns bænabeiða (praying mantis) orðið skúffuð af því að karldýrið skynjaði ekki að hún væri fúl af því að hann tók ekki eftir drullunni sem hafði safnast saman á greininni þeirra. Það sem meira er að þær dýrategundir sem maka sig fyrir lífstíð eru sárafáar, a.m.k. miðað við fjölda dýrategunda á þessari jörð. Mörgæsir eru meðal þeirra dýrategunda sem halda sig við sama maka alla ævi en flestar aðrar dýrategundir velja sér maka eftir hentisemi (þ.e.a.s. hver er við höndina).

Núna hins vegar erum við að verða vitni að því að ný ráðandi dýrategund er að brjótast fram á hinn ægilega vígvöll sem við köllum lífið. Þetta er dýrategund sem ég hef kosið að skíra Homo Acerbus (áhugasamir geta flett upp þýðingunni á latneska orðinu Acerbus) en flestir aðrir kjósa að nefna þessa dýrategund.... konu. Þessi dýrategund hafnar öllum reglum sem dýraríkið hefur sett fram og kýs að búa sér til nýjar reglur sem eiga að yfirfærast yfir á allar aðrar dýrategundir, og þá sérstaklega yfir á Homo Sapiens. Skyndilega skulu hugsanir verða lesnar, mökun skal gilda fyrir lífstíð og tilfinningar Homo Acerbus skulu ávallt vera í fyrsta sæti. Auðvitað þarf ekki að taka það fram að þær dýrategundir sem fylgja ekki eftir þessum nýju náttúrulögmálum Homo Acerbus eru samstundis dæmdar einfaldar og þar af leiðandi vanþróaðar. Ég vil meina að þessi nýja dýrategund sé ekkert annað en bara stökkbreyting á Homo Sapiens. Svona eins og aumingja barnið sem fæddist með 3 hendur eða Wayne Rooney (sem ég held reyndar að sé þróunarstökk afturábak, með sterkum keim af Homo Erectus). Sem betur fer þá hafa bæði Homo Sapiens og Homo Acerbus tekið vísindi upp á sína arma og tel ég því að fyrst það er hægt að fjarlægja eina tegund stökkbreytingar (t.d. aukahöndina á barninu) þá hljóta læknavísindin að geta fjarlægt þessa stökkbreytingu úr Homo Acerbus svo að við getum öll aftur orðið Homo Sapiens.

Þið megið samt ekki misskilja mig og halda því fram að ég sé einhver karlremba sem vill bara hafa konur inni í eldhúsinu eða á bakinu (eða einhverri annarri stellingu) í svefnherberginu. Ég er algjörlega fylgjandi jafnrétti og öllu sem því fylgir. Ég vil bara gera lífið einfalt aftur.... eins og það á að vera!

Klíka?!?

OK, ég er einn af þeim gamaldagsgaurum sem finnst að fólk eigi að komast áfram á sínum eigin verðleikum en ekki útaf því hverja það þekkir eða hverjir foreldrar manns eru. Núna er ég í þeirri stöðu að ég er alvarlega farinn að leita mér að nýju starfi og það verður að segjast eins og er að það er ekki mikið um bitastæð störf fyrir sagnfræðinga með brennandi áhuga á fjölmiðlun. Eftir að hafa kolfallið á hæfnisprófi fyrir Mbl þá ákvað ég að setja þann draum aðeins á hilluna og reyna fyrir mér annars staðar um stundar sakir.

Nú er staðan hins vegar sú að bróðir minn sem virðist vera með sambönd og vini alls staðar (enda gallharður sjálfstæðismaður, ojbara) segist geta reddað mér vinnu nánast hvar sem er (þar á meðal á Mbl.) bara með því að tala við rétta fólkið. Kallið mig fífl en þetta finnst mér einhvern veginn vera rangt. Mér finnst að ef ég fæ einhverja svona sérmeðferð þá er ég að stela starfinu frá einhverjum sem hefur haft mikið fyrir því að fá þetta starf og er jafnvel mun hæfari í starfið heldur en ég. En kannski er ég bara að troða mér fram fyrir einhvern sem þekkir ekki alveg eins valdamikið fólk og hann brósi minn.

En hvað finnst ykkur fáu sálum sem lesið bloggið mitt??? Á ég að halda áfram að reyna að troða mér áfram á eigin verðleikum eða á ég að þiggja frítt far með sjálfstæðishraðlestinni?

kv.
V - daðrandi við bláu höndina!

SUMAR!!!!!!

Ahhhh.... íslenska sumarið!!! Maður er búinn að kvarta undan þessu landi svo oft að ég er í alvörunni að hugsa bara um að hætta því. Ég ætla þó bara að segja að ég bind miklar vonir við þetta!

Annars er heimsókn til Gumma farinn að verða meira og meira heillandi. Mér skilst nefnilega að í Danmörku komi upp árvisst fyrirbæri sem heitir sumar og mig er farið að langa mjög mikið til þess að kynnast því.

Lygar í auglýsingum!!!!!!!!!!!!!

Það var logið að mér um helgina..... reyndar er það bara karmað að bíta mig til baka en engu að síður var logið að mér um helgina. Ég sá nefnilega auglýsinguna nýju (eina af þeim) frá DV þar sem trén eru að tjá sig um hvað þau vilja verða stór og mikil og verða blaðsíður hjá DV. Ok... ég geri mér grein fyrir því auglýsingar ljúga oft en aldrei hefur verið logið jafn gróflega að mér og þarna.

Maður hefði nefnilega haldið að þegar að þessu blessaða DV blaði var breytt í helgarblað þá hefði fólkið sem stendur að þessu blaði meiri tíma til að sinna sínu starfi og meiri tíma til að gera hlutina VEL.

Þvílíkt og annað eins sorpblað hef ég aldrei séð og ég legg til að DV noti smáauglýsingarnar á síðum blaðsins til þess að auglýsa eftir "blaðamönnum" sem geta skrifað á íslensku. Ekki það að ég þykist vera einhver undradrengur íslenskrar tungu en ég er þó skömminni skárri heldur en þetta. Og kannski í leiðinni þeir taki sig til og skipti út lesblinda prófarkarlesaranum því hann er alls ekki að gera sig.

En vitiði hvað mesta vitleysan er.... það að þetta helvítis blað sendi mér bréf þar sem þeir biðja MIG um að borga ÞEIM pening sem ég skulda þeim síðan ég var síðast áskrifandi hjá þeim (og það var fyrir 2 árum síðan)..... og ég greiddi upp þessa skuld fyrir einu ári síðan. Mér finnst það svolítið merkilegt að rukkunarbréfið frá þeim er mun betur skrifað heldur blaðið sjálft. Einhvern veginn átti ég von á því að það myndi birtast einhver stór rumur á borð við Magnús Ver heima hjá mér, haldandi á hafnaboltakylfu og með miða sem stæði á:"Ég er að rukka fyrir Dagblaðið!"

I have a dream.....

9.júni 2006
Ármúli 31

Kæru vinir, við erum saman komin hér til að fagna stóru skrefi í mannkynssögunni. Of lengi hafa þjóhnappar okkar þurft að sitja á sætum sem eru ekki verðug til að vera bæli fyrir flækingshunda. Of lengi hafa karlmenn þessa heims þurft að standa upp frá spennandi knattspyrnuleikjum til þess að ná í bjór en hafa í leiðinni misst af marki, rauðu spjaldi eða flassara. Of lengi höfum við sætt okkur við þetta ástand en ég segi hingað og ekki lengra.
Ég á mér draum um að einn góðan dag, geti karlmenn þessa lands setið í stólum sínum og liðið eins og þeir sitji á heilu fjalli af beinlausum hvolpum.
Ég á mér draum um að einhvern daginn getum við náð okkur í kaldan bjór án þess að þurfa að standa upp frá spennandi fótboltaleik!
Ég á mér draum um að það sé til stóll sem að er í senn dúnmjúkur og geymslurými fyrir köld drykkjarföng.
Kæru vinir, draumar geta ræst. Þessi stóll er til og frá og með deginum í dag mun ég setjast niður í hann og ég mun ekki standa upp aftur. Ég mun breiða út boðskaps hins heilaga LaZboy þar til allar stúlkur og drengir heimssins munu sitja í svona stól. Dýrðardagur, lofið Allah. Dýrðardagur, blessi okkur Jesús. Amen, Halelúja, yfir og út!