Vanhæfur.....

Ég hef undanfarna daga verið í mjög mikilli naflaskoðun. Ég er nefnilega búinn að átta mig á því að ég stend um þessar mundir á miklum krossgötum. Undanfarin 20 ár (svona grófleg ágiskun) hef ég verið námsmaður, ég hef ráðið mig í störf undir þeim formerkjum að ég er námsmaður og ég hef alltaf vitað framhaldið hjá mér..... aftur í skóla til að læra meira. Núna hinsvegar sé ég fram á breytingar og ég veit ekki hvort að ég sé reiðubúinn til að taka það skref. Ég lít í kringum mig og sé alls staðar fólk sem er með sína stefnu á hreinu. Raggi fór í smiðinn á sínum tíma og það er hans thing (enda helvíti fær á því sviði, a.m.k. klikkar ekki smiðsaugað hjá honum þegar það þarf að tilkynna mér að hillur séu skakkar). Maggi er stjórnmálafræðingur af bestu gerð enda er sá maður ekki hæfur til neins annars en að rífa kjaft.

Það sem ég er að átta mig á hins vegar er það að ég er ekki hæfur til neins. Ég hef á mínum langa námsferli ekki náð að tileinka mér neitt sem myndi gera mig ómissandi í augum tilvonandi vinnuveitenda. Það yrði kaldur dagur í helvíti þegar ÍSTAK myndi sleppa klónum af Ragga og Maggi mun ganga inn í hvaða starf sem er að námi loknu (enda í stífum æfingarbúðum fyrir bláa herinn hjá Morgunblaðinu). Ég hins vegar kann ekki neitt!!!! Ég er í gjörsamlega VONLAUSU starfi sem ég þó get ekki sleppt fyrr en ég hef aðra vinnu í bakhöndinni, ég eins og allir aðrir þarfnast peninga til að geta lifað. Málið er bara það að engum vantar sagnfræðing með mikinn áhuga (og smá grunnmenntun) á fjölmiðlun.

Ég var engan veginn nógu klár fyrir MBL (sem segir mikið um greindarmuninn á okkur Magnúsi) og ég efast stórlega um að Umhverfisráðuneytið setji sig í samband við mig. En ég er samt harður á því að það forskot sem Maggi hefur á mig af vitsmunum, jafnist út þegar litið er á holdafar og innri fegurð (við erum nú báðir enginn Brad Pitt)

Það sem ég er að gera um þessar mundir er hreinlega að leita eftir kraftaverki. Ég er með allar klær úti og ég vona heitt og innilega að ég muni finna eitthvað annað starf fljótlega því ég er farinn að mygla í mínu núverandi starfi.

En nú ætla ég að hætta þessu áður en ég fer að halla mér að flöskunni. Alcohol makes the voices stop!